YANGA YATUSULIWA NA MBAO....ALI YANGA ALA KICHAPO.

YANGA imevuliwa taji la pili msimu huu, baada ya kutupwa nje ya michuano ya Kombe la Shirikisho la Soka Tanzania (TFF), inayojulikana kama Azam Sports Federation Cup (ASFC) kufuatia kipigo cha 1-0 kutoka kwa Mbao FC katika mchezo wa Nusu Fainali jioni ya leo Uwanja wa CCM Kirumba, Mwanza. 
Mapema mwanzoni mwa msimu, Yanga ilivuliwa taji la Ngao ya Jamii baada ya kufungwa na Azam FC kwa penalti 4-1 kufuatia sare ya 1-1 katika mchezo wa kuashiria ufunguzi wa msimu mpya, Agosti 17, mwaka jana. 
Na sasa Yanga ina jukumu la kutetea taji lake moja lililobaki na kubwa zaidi, la Ligi Kuu ya Vodacom Tanzania Bara ambako wanakabana koo na wapinzani wao wa jadi, Simba SC.
Katika mchezo wa leo uliochezeshwa na refa Erick Onoka wa Arusha, aliyesaidiwa na Julius Kasitu na Mdogo Makame wa Shinyanga hadi mapumziko, tayari Mbao walikuwa mbele kwa bao hilo 1-0.
Ni Yanga wenyewe waliojifunga bao hilo dakika ya 27, baada ya beki wake, Andrew Vincent ‘Dante’ kuunganishia nyavuni kwake krosi ya Pius Buswita katika harakati za kuokoa.
Mbao walibadilisha mfumo wa uchezaji baada ya bao hilo na kuanza kucheza kwa kujihami, jambo ambalo liliwasumbua Yanga.
Kipindi cha pili, Mbao walifanikiwa kuendekea kuwabana Yanga na kujilinda vyema hatimaye kuandika historia ya kuwa timu ya kwanza ya Mwanza na ya nje ya Dar es Salaam kwa ujumla kufika fainali ya Kombe la TFF.
Na sasa Mbao FC watakutana na Simba SC katika fainali ya michuano hiyo baadaye mwezi huu Uwanja wa Taifa, Dar es Salaam. Simba iliwatoa washindi wa pili wa msimu uliopita, Azam FC kwa 1-0 jana, bao pekee la Mohammed Ibrahim.

KICHAPO CHA ALI YANGA KWA USHIRIKIANA

Shabiki maarufu wa Yanga, Ally Yanga amekutana na kipigo kikali kutoka kwa mashabiki walioelezwa ni wa Simba wanaoiunga mkono Mbao FC.

Mashabiki hao wa Mwanza, wamempiga Ally Yanga kwenye Uwanja wa CCM Kirumba jijini Mwanza kabla ya Yanga kuivaa Mbao FC kwenye uwanja huo, leo.

Yanga inaivaa Mbao FC kuwania kucheza fainali dhidi ya Simba ambao jana wameufunga Azam FC kwa bao 1-0 na kutinga fainali.

Mmoja wa mashabiki wa Simba mjini Mwanza, Fred Bundala ameiambia SALEHJEMBE, Ally Yanga alilazimisha kuingia uwanjani na kumwaga vitu ambavyo wao waliamini ni ushirikina.

“Mwanzo tulimueleza kistaarabu, hakusikia. Tukamsisitiza, akaanza kutoa maneno ya kashfa, nyie watu wa Dar mna dharau sana. Tukaona acha tumkaribishe Mwanza,” alisema.

Ally Yanga alionekana akiwa anatema mate yenye damu baada ya kushambuliwa na mashabiki hao ambao walionekana wengi kuliko wa Yanga.

Juzi, mashabiki wa Yanga walikesha uwanjani hapo wakiulinda uwanja huo kuhakikisha hakuna vitendo vya kishirikina.

Lakini mashabiki wa Mbao FC walilaumu kuwa Yanga wamekuwa wakifanya ushirikina, nao wakaongeza nguvu kuongeza ulinzi usiku wa kuamkia leo.